A re cinque d''a matina
'u cerviaddhu se rimina.
Quannu è scuru e 'un vidu nente
quanti tribuli a ra mente!
Lassu luatani e taluarni,
nne sù chjnu tutti i juarni.
E ra musa, cchi beddizza,
ogne ttantu m'accarizza.
Oje, 'u dui de frevaru,
pigliu pinna e calamaru.
Cacciu puru 'nu libbrettu,
scrivu a ttie ccù ttantu affettu.
Sì' n'amicu raru e caru
d''a provincia 'e Catanzaru.
Ppe tte strinciare 'na manu
cce vò certu l'ariopranu.
Oje è festa, è 'u compleannu,
è arrivatu puru aguannu.
Monnavanti t'abbicini all'ottantina,
...nne restaru 'na vintina.
Mò arricètta ogne malannu
e secùta ogne affannu.
Si 'un te vue sentire affrittu,
stuzzicallu lu pitittu.
Sculatillu 'nu parmu 'e vinu,
è medicina ppe ru stentinu.
E stà sicuru, arricchja ccà,
'a picundrìa si nne và.
Ccù l'aiutu d' 'u Signure,
e a 'nna manu lu vastune
t'alluntani d' 'u fuddhùne!