Prisentannume ‘a pagella
chi de' pejie eradi ‘a meglia
‘n ‘simminariu a Catanzaru
me dicìa ‘nu prelatu:
“Ccu ‘ssi voti ‘ud'hai riparu,
a fin'annu si' fricatu!”
E me cunta ‘nu papiaddu
chi me sciodda ‘u cerviaddu:
“Tu si' curtu ‘e cumprensoriu,
si continui ‘e ‘stu passu,
ccu ‘ssu biaddu ripertoriu
ti nne tuarni subitu a spassu.”
Doppu tante litanie,
io pue pianzu intr'e mie:
“Mo' chi sugnu diffidatu,
ohi cchi brutte sufferenze,
già me siantu disperatu
ccu ‘sse nigure patenze!
Si ‘a scola ‘un fà ppe' mmie,
me ricuagliu ‘e buffetterie.
Sugnu stuffu ‘e ‘stu cummiantu,
a ru diavulu ‘u celibatu,
mò fhiniscia ogne turmiantu,
puedomane sugnu ‘nzuratu.”
Pue m'addugnu, a fine giugnu,
ca parpàle ‘un cce sugnu;
e ppe' ‘ud'avire tantu cummattu
me truavu subitu ‘nu mistiari
‘un cce pianzu due vote e partu,
arrolatu a ri carbiniari!