A ‘sta vita tuttu passa
ddè si’ moni ‘un ti cce lassa!
Me ricuardu chi guagliune,
ccu’ ‘nu fhiarru ppe’ cumannu
e ‘nu ‘nchjiastru de circhjiune
o ‘na rota ‘e brigichetta,
senza avire mai ‘n’affannu
jia scappannu sempre ‘e fretta.
A ru campu de pallune
in difhesa o ar’attaccu
io parìa ‘nu leune,
me movìa sempre de scattu.
Vitriualu e girune,
stennicchjiatu a ‘nna carrozza,
cuamu ‘u vualu ‘e n’airune,
‘i scinnìa sempre de corza.
Mo’ vicinu a sessantanni
già me siantu ‘nu strippune,
tuttu chjinu de malanni,
sugnu propriu ‘nu scasciune.
Ma si pianzu a chira banna,
ppe’ ra mente mi se spanna
‘nu scumpuartu chi me scanna
ppe’ ‘ssa vita ch’è tiranna!