Ritrovannulu ‘n viaggiu,
te ringraziu d'u messaggiu,
ccussicchè mo' te rispunnu
de ‘nu capu ‘e n'atru munnu.
‘E ‘sta parrata ‘u ‘ngagliu nente
mi se sta stonannu ‘a mente;
cce vulerra Giuliana,
ppecchì moni è ‘nna simana
ccu ‘ste “gasse” e ccu ‘ste “grosse”,
io cce ‘ngarru sulu a mosse.
Quantu è caru ccà ‘u vinu!
Me saluti Mariolinu.
Tiresanna è ssanata
o se trova ‘ntaveddata?
‘Nu salutu dugnu a Minussu,
e ppue n'atru a Micu Russu.
Fhore chjova e tira viantu,
fhinarmente pigliu abbiantu;
quatelatu ‘e tanti panni,
‘nu salutu pruaju a Giuanni.
Ppe' ‘u ritardu te chjadu scusa
e me scialu chi ‘a musa
queta queta s'abbicina
ammuttannu Cesarina.
Mo' chi ‘u spaziu è terminatu,
tanti auguri a ru strippignatu.
‘Nu ricuardu a ttie te mannu
ppe' r'aguri ‘e Bon'Annu
ccu ‘nna bedda cartulina
‘e Ciccu Peppe e d'a regina.